Një zjarr i përmasave shqetësuese ka rënë këtë të mërkurë në zonën e njohur si fusha e Aviacionit, në lagjen Kushtrimi të Vlorës, duke kthyer frikën tek banorët për një situatë që rrezikon të përsëritet çdo verë. Flakët janë përhapur me shpejtësi në një zonë me vegjetacion të thatë dhe të lënë pas dore, duke rrezikuar banesat përreth.

Sipas dëshmitarëve në vendngjarje, zjarri nisi papritur dhe u përhap me ritme të shpejta, ndërsa ende nuk është e qartë nëse bëhet fjalë për një aksident apo zjarrvënie të qëllimshme. Banorët janë detyruar të ndërhyjnë vetë në momentet e para, për të ndalur përhapjen e flakëve.

“I pari që reagoi ishte një elektriçist i lagjes, i cili lokalizoi vatrën derisa mbërritën zjarrfikësit”, tregojnë banorët, të cilët shprehen se nuk është hera e parë që zona përballet me rrezik të tillë. Vetëm një vit më parë, një tjetër zjarr kërcënoi banesa dhe depo private, por asnjë masë parandaluese nuk është marrë që atëherë.

Një prej banorëve i revoltuar u shpreh:

“Nuk jam as i partive, as i ideve. Jam i krahëve, punoj, paguaj taksa dhe dua shërbime nga bashkia. Po t’i shikosh, as barin nuk e presin, edhe shërbimet më minimale mungojnë. Ne po presim të digjet ndonjë shtëpi që të marrin masa?”

Zjarri u vu nën kontroll nga forcat zjarrfikëse, të cilat arritën në kohë dhe neutralizuan flakët pa shkaktuar dëme në njerëz apo banesa, por ngjarja ka ringjallur shqetësimin për mungesën e mirëmbajtjes dhe kontrollit në zonat e gjelbërta, që përbëjnë rrezik të përhershëm gjatë muajve të verës.

Banorët e lagjes Kushtrimi i bëjnë apel Bashkisë së Vlorës dhe autoriteteve përkatëse që të ndërhyjnë urgjentisht me pastrim të zonës, si dhe të hartojnë një plan konkret për parandalimin e zjarreve, përpara se situata të dalë jashtë kontrollit.

“Nuk duam të zgjohemi nga flakët, por nga zgjidhjet,” thonë ata.