Fshati Frashër në Fier është tronditur nga një ngjarje e rëndë që ka truar në dritë një dramë të heshtur familjare. Anesti Rama, 56 vjeç, u gjet i vdekur në banesën e tij, fillimisht i raportuar si viktimë e një aksidenti, por hetimet zbuluan të vërtetën makabre: ai ishte mbytur me tel nga vajza e tij, Emanilda Rama, 26 vjeçe.

E reja u arrestua nga policia, pasi më herët kishte tentuar ta paraqiste ngjarjen si vdekje aksidentale. Nëna e saj, Valbona Rama, është shoqëruar dhe po hetohet si bashkëpunëtore në krim, pasi dyshohet se ka pastruar trupin e të ndjerit për të fshehur gjurmët dhe për të inskenuar një version të rremë të vdekjes.

Zënka të vazhdueshme në familje, policia thirrur disa herë

Etmond Rama, kushëri i viktimës, tha për mediat se konfliktet në familje ishin të vazhdueshme, veçanërisht mes çiftit:

“Jo një herë, por 10-15 herë ka ardhur policia në këtë shtëpi për shkak të sherreve. Ishin të tensionuar prej kohësh.”

Sipas burimeve hetimore, vajza ka pranuar autorësinë, duke deklaruar se e vrau të atin sepse ishte fanatik dhe i kufizonte lirinë personale, nuk e lejonte të dilte apo të vishej si dëshironte. Ajo jetonte prej kohësh me prindërit, pasi ishte ndarë nga partneri.

Nëna në hetim për ndihmë në fshehjen e krimit

Hetimet treguan se trupi i viktimës ishte larë dhe pastruar, me qëllim për të fshirë çdo gjurmë dhune, ndërsa në pjesën e fytit u konstatuan shenja mbytjeje me mjet të fortë.

Valbona Rama është aktualisht në komisariat dhe përballet me akuzën e bashkëpunimit për fshehjen e krimit, ndërsa ngjarja ka tronditur komunitetin lokal, që e njihte familjen si të tërhequr dhe të mbyllur.

Prokuroria ka nisur hetimet për vrasje me dashje dhe fshehje të krimit, ndërsa pritet që të dyja gratë të dalin përpara gjykatës në ditët në vijim për masën e sigurisë.