Pas publikimit të pamjeve të dhunës së ushtruar ndaj një kamarieri në një hotel në Vlorë, lideri i opozitës Sali Berisha ka reaguar me një shënim në Facebook, duke dënuar ashpër ngjarjen ku i përfshirë ishte edhe një efektiv policie jashtë shërbimit.

“Akt dhune dhe krimi! Ish-shefi i krimeve në Vlorë godet kamarierin 17-vjeçar për fajin e vetëm se ju solli një shishe uji tepër! Dënoj me forcën më të madhe këtë dhunë të shëmtuar ndaj të riut në shërbim”, shkruan Berisha.

Në reagimin e tij, ish-kryeministri e cilëson këtë episod si një skandal që tregon përkeqësimin e rendit dhe bashkëpunimin mes krimit dhe strukturave të policisë.

“Një super skandal ka ndodhur në Vlorë mbrëmë, është dhunuar kamarieri 17 vjeçar për 1 shishe ujë më tepër që çoi në tavolinë. Ardian Isufi, ish shefi i qarkullimit Vlorë se bashku me Laert Bimon, një person me rekorde të rënda kriminale kanë dhunuar kamarierin për shkak se ai ju dha një bidon më shumë me ujë.
Ngjarja skandaloze e kryer nga njerëz skandalozë dhe kriminelë ka ndodhur mes turistëve dhe klientëve.
Kjo ngjarje është një kambanë alarmi për të gjithë, në momentin që kur krimi dhe uniforma e shtetit ndajnë tavolinën bashkë!”

Pamjet e dhunës, të shpërndara në rrjetet sociale, kanë ngjallur indinjatë të gjerë publike, ndërsa ngjarja është nën hetim nga autoritetet.