TIRANË – Kreu i Partisë Demokratike, Sali Berisha, ka ngritur një tjetër akuzë ndaj qeverisë, duke e cilësuar si “krim elektoral” shpërndarjen e pagesave prej 40 eurosh për rreth 200 mijë qytetarë me aftësi ndryshe dhe kujdestarët e tyre, gjatë fushatës për zgjedhjet e 11 majit.

Në një konferencë për mediat, Berisha deklaroi se ndonëse vendimi për këto shpërblime ishte marrë që në dhjetor, zbatimi i tyre u bë qëllimisht në kulmin e fushatës, me qëllim blerjen e votës.

“Ka shpërndarë për 164 mijë persona me aftësi ndryshe dhe për mijëra e mijëra kujdestarë të tyre, që në total shkojnë rreth 200 mijë, nga 4 mijë lekë apo 40 euro. E gjitha, pjesë e një fushate të pastër për blerje votash,” u shpreh Berisha.

Sipas tij, kjo është një tjetër provë e cinizmit dhe pashpirtësisë së narkoqeverisë, që shfrytëzon edhe shtresat më të pambrojtura për përfitim politik.

“Në vend që të ndjekë politika për rritjen e pensioneve dhe vendosjen e minimumit jetik, qeveria shpërndan para në prag të votimeve. Shpërblime për votë për pensionistët, për personat me aftësi të kufizuar, për kujdestarët e tyre. Kjo është një farsë e turpshme që nuk mund të pranohet,” theksoi lideri i opozitës.

Ai shtoi se Partia Demokratike nuk do ta njohë rezultatin e këtyre zgjedhjeve, duke paralajmëruar se aksioni opozitar do të vazhdojë për të garantuar votën e lirë për qytetarët.

“PD nuk do të pranojë kurrë një proces të tillë të ndotur. Do bëjmë gjithçka që shqiptarët të votojnë si qytetarë të lirë,” përfundoi Berisha.