HAGË – Dhomat e Specializuara të Kosovës (DhSK) në Hagë kanë vendosur të vazhdojnë masën e paraburgimit për ish-presidentin Hashim Thaçi, si dhe për Bashkim Smakajn, Isni Kilajn dhe Fadil Fazliun, në kuadër të hetimeve për pengim të administrimit të drejtësisë.

Vendimi është marrë nga gjyqtarja e procedurës paraprake, Marjorie Masselot, e cila argumenton se masa është e nevojshme dhe proporcionale, duke përmendur rrezikun e arratisjes dhe mundësinë e ndërhyrjes në procesin gjyqësor nga ana e të akuzuarve.

Sipas Masselot, dyshimi i bazuar për përfshirjen e Thaçit në veprat penale për të cilat akuzohet, mbetet i qëndrueshëm, ndërsa mundësia për pengim të dëshmitarëve është ende reale.

Aktakuza e re: Bashkëpunim për të ndikuar në dëshmitarë

Në dhjetor 2024, ndaj Thaçit, ish-ministrit të Drejtësisë Hajredin Kuçi, dhe tre të pandehurve të tjerë, u ngrit një aktakuzë e re, që i ngarkon me veprën penale të pengimit të personave zyrtarë në ushtrimin e detyrës.

Sipas aktakuzës së Zyrës së Prokurorit të Specializuar (ZPS), gjatë periudhës prill 2023 – nëntor 2024, Thaçi u ka dhënë informacione konfidenciale për dëshmitarët e ZPS-së Isni Kilajt, Bashkim Smakajt, Fadil Fazliut dhe Hajredin Kuçit, gjatë vizitave në qendrën e paraburgimit.

Më tej, akuzohen se kanë bashkërenduar tri grupe të veçanta, të përbëra nga personat e mësipërm dhe të tjerë ndaj të cilëve ende nuk është ngritur aktakuzë, me qëllimin për të ndikuar në dëshmitë e dëshmitarëve në procesin gjyqësor që po zhvillohet për krime të supozuara lufte.

Kjo çështje ngre shqetësime serioze për integritetin e procesit gjyqësor dhe për sigurinë e dëshmitarëve, një aspekt të cilin DhSK e ka theksuar vazhdimisht si prioritet në gjykimet për krime lufte.

Hetimet për këtë dosje vazhdojnë, ndërsa procesi kryesor ndaj Hashim Thaçit dhe të bashkëakuzuarve për krime lufte është ende në zhvillim.