Familja e Tom Phillips, një babai nga Zelanda e Re që është në arrati prej gati katër vitesh bashkë me tre fëmijët e tij, ka bërë një thirrje publike prekëse për kthimin e tyre në shtëpi.

Phillips u largua në dhjetor 2021 drejt zonës së Waikato-s me fëmijët Jayda (12 vjeç), Maverick (10) dhe Ember (9), pas një konflikti me nënën e tyre. Ai nuk ka kujdestari ligjore për fëmijët dhe prej asaj kohe ka qëndruar i fshehur.

“Na mungon shumë, më mungon të jem pjesë e jetës tënde dhe dua të shoh ty dhe fëmijët”,
— tha motra e tij, Rozzi Phillips, gjatë një interviste televizive, duke shpresuar që mesazhi i saj të arrijë tek Tomi.

Edhe nëna e Phillips i ka dërguar një letër emocionale, e cila u lexua gjatë intervistës:

“Më dhemb sa herë shoh fotot e tua dhe të fëmijëve, duke menduar se çfarë mund të kishte qenë nëse nuk do të ishe larguar. Jayda, Maverick, Ember, ju dua shumë dhe më mungoni çdo ditë. Shpresoj që një ditë të ktheheni.”

Familja e përshkruan Tomin si një njeri me humor dhe aftësi të jashtëzakonshme për mbijetesë në kushte ekstreme, gjë që ka bërë që fshehja e tij në zonën e largët të Marokopës të zgjasë kaq shumë.

Policia e ka pasur të vështirë ta lokalizojë dhe dyshon se mund të jetë ndihmuar nga persona të tjerë. Nëse kjo është e vërtetë, motra e tij thotë se do të donte të kishte të paktën një shenjë që fëmijët janë mirë.

Ky nuk është rasti i parë i zhdukjes së Phillips. Në shtator 2021, ai u shpall i zhdukur për 19 ditë bashkë me fëmijët, përpara se të shfaqej papritur në fermën e prindërve duke pretenduar se kishte qenë në një kamping të gjatë për t’u qetësuar. Megjithatë, disa muaj më vonë, ai u zhduk sërish.

Në vitin 2023, policia dyshon se Phillips ka kryer një grabitje banke dhe një tentativë grabitjeje në një dyqan të vogël, ndërsa në tetor 2024 u shfaq rastësisht në një video të regjistruar nga disa gjuetarë. Përpjekjet për ta kapur kanë qenë të pasuksesshme.

“Është koha që fëmijët të dalin nga kjo situatë dhe të vazhdojnë jetën e tyre. Gjithçka mund të zgjidhet, por ka kaluar shumë kohë. Le ta mbyllim këtë histori dhe le të rikthehen në shtëpi të sigurt”,
— deklaroi detektivi Andrew Saunders.