Një ngjarje tronditëse ka tronditur opinionin publik në Kinë, ku një 19-vjeçar ka rënë viktimë e një mashtrimi të pabesueshëm nga e dashura e tij 17-vjeçare, e cila e shiti si skllav në Myanmar.

Sipas mediave vendase, historia nisi në vitin 2024, kur i riu njohu vajzën në një klub nate dhe besoi se kishte gjetur dashurinë e jetës. Ajo krijoi një imazh luksi në rrjete sociale, duke u shfaqur me rroba dhe çanta të markave të shtrenjta – që më vonë rezultuan të ishin false – dhe pretendonte se ishte pasardhëse e një familjeje të pasur nga Myanmar, me prindër “menaxherë investimesh”.

E mashtruar nga kjo fasadë, viktima pranoi të nisej me të për një udhëtim në Tajlandë dhe Myanmar, pasi 17-vjeçarja i premtoi se do ta ndihmonte të gjente një punë të mirëpaguar. Në shkurt 2025, ai udhëtoi fshehurazi drejt Bangkokut, por udhëtimi u kthye në një makth.

Në Tajlandë, e mitura e tërhoqi drejt kufirit me Myanmar, ku e braktisi, pasi dyshohet se përfitoi para për “shitjen” e tij. Pak më vonë, një person i armatosur i mori pasaportën dhe telefonin, duke e dërguar në një qendër pune të detyruar.

Aty, 19-vjeçari u detyrua të punonte 16 deri në 20 orë në ditë, ndërsa kur nuk arrinte objektivat, e rrihnin me shufra metalike, e mbyllnin në dhoma të errëta dhe shpesh e lënin pa ushqim. Abuzimi ishte aq i rëndë sa pas disa muajsh ai humbi dëgjimin.

Rrëmbyesit kërkuan 40,000 euro për lirimin e tij. Vetëm pasi familja pagoi shumën, ai u kthye në Kinë, në qershor, pas katër muajsh robërie. Ndërkohë, 17-vjeçarja u arrestua gjatë kthimit të saj nga Tajlanda dhe aktualisht përballet me akuza për mashtrim dhe trafikim njerëzor.

Familja e viktimës ka bërë të ditur se i riu po vuan nga trauma e rëndë psikologjike, ankthi dhe makthet, ndërsa kërkon që autorja e tradhtisë të marrë dënimin maksimal.