Sot mbushen 27 vite nga vrasja e deputetit demokrat Azem Hajdari, një prej figurave më të rëndësishme të tranzicionit politik shqiptar. Hajdari u ekzekutua më 12 shtator 1998 pranë selisë së Partisë Demokratike, ngjarje që tronditi politikën dhe shoqërinë shqiptare.

Në ceremoninë përkujtimore të zhvilluar në mëngjes pranë monumentit të tij në selinë e vjetër të PD-së, kreu i demokratëve Sali Berisha dhe drejtues të tjerë të partisë vendosën kurora me lule dhe mbajtën një minutë heshtje.

Në fjalën e tij, Berisha e cilësoi Hajdarin si simbol të pluralizmit dhe të sakrificës për lirinë. Ai akuzoi kryeministrin Edi Rama për “shtypjen e votës dhe fjalës së lirë”, duke e krahasuar situatën aktuale me diktaturën komuniste.

“Idealet e Azem Hajdarit sot janë më kushtruese se kurrë. Shqipëria është zhytur në diktaturën e drogës, krimit dhe vjedhjes. Sot vota e lirë nuk ekziston, fjala e lirë është e shtypur. Është një ditë betimi për çdo demokrat, për çdo opozitar, që të ngrihemi për të rikthyer pluralizmin,” – tha Berisha.

Azem Hajdari mbetet një nga figurat historike të politikës shqiptare. Ai u shqua si një nga udhëheqësit e lëvizjes studentore të vitit 1990 që rrëzoi diktaturën komuniste dhe ishte kryetari i parë i Partisë Demokratike. Vrasja e tij në 1998 u konsiderua një krim politik dhe vazhdon të mbetet një prej plagëve të hapura të tranzicionit shqiptar.