Një shpërthim i fuqishëm ka tronditur pasditen e së shtunës lagjen punëtore Vallejas, në jug të Madridit, duke shkaktuar një viktimë dhe mbi 25 të plagosur, tre prej tyre në gjendje të rëndë.

Ngjarja ndodhi rreth orës 16:00 në barin “Mis Tesoros”, i vendosur në katin përdhes të një ndërtese trekatëshe. Përplasja e fortë u shoqërua me shembje të pjesshme të strukturës, duke lënë zona të tëra të mbuluara nga rrënojat.

Pas një operacioni disaorësh, ekipet e shpëtimit gjetën trupin e një burri 52-vjeçar nën rrënoja. Identiteti i tij nuk është bërë ende publik, por sipas autoriteteve ai ndodhej brenda lokalit në momentin e shpërthimit.

“Ka pasur një shpërthim për shkak të një akumulimi gazi. Ende nuk mund të themi çfarë lloj gazi apo ku ka ndodhur rrjedhja,” deklaroi Manuel Marín, kreu i zjarrfikësve të Komunitetit të Madridit.

Ndërtesa ka pësuar dëme të rënda strukturore, ndërsa si masë sigurie 10 familje u evakuuan. Zëvendëskryetarja e Bashkisë së Madridit, Inmaculada Sanz, theksoi se është përjashtuar mundësia që të ketë persona të tjerë nën rrënoja, por kërkimet vijuan për të garantuar sigurinë.

Ngjarja ka shkaktuar tronditje tek banorët e zonës, të cilët tregojnë se në momentin e shpërthimit kanë ndjerë “dridhje të forta dhe një zhurmë të tmerrshme”.

Autoritetet spanjolle kanë nisur hetimet për të zbardhur shkaqet e sakta dhe për të verifikuar nëse janë respektuar masat e sigurisë në ambientet e barit.