Është zbuluar identiteti i shtetasit shqiptar që u arrestua më 9 tetor në kryeqytetin italian, me akuzën e trafikut dhe shpërndarjes së lëndëve narkotike.

Sipas burimeve nga autoritetet italiane, i arrestuari është Kristian Preni, 23 vjeç, i cili u kap në flagrancë nga karabinierët teksa ecte në rrugë me një çantë ku kishte fshehur një shumë të konsiderueshme parash.

Gjatë kontrollit në banesën e tij, hetuesit zbuluan dhe sekuestruan rreth 200 kilogramë kokainë, një armë zjarri tip pistoletë dhe 30 mijë euro në para të gatshme.

Sipas mediave italiane, operacioni u zhvillua pas një hetimi disamujor, ku Preni dyshohet të ketë qenë pjesë e një rrjeti të gjerë shpërndarjeje droge që furnizonte disa zona të Romës dhe periferisë.

Autoritetet italiane konfirmojnë se hetimet vazhdojnë për të zbuluar bashkëpunëtorët dhe rrjetin ndërkombëtar të trafikimit ku mund të ketë qenë i përfshirë 23-vjeçari shqiptar.

“Operacioni është pjesë e një fushate të gjerë kundër trafikut të drogës që përfshin disa rajone të Italisë,” – kanë deklaruar burime pranë Karabinierisë së Romës.

Kristian Preni ndodhet aktualisht në paraburgim, ndërsa pritet që Prokuroria e Romës të kërkojë masën e arrestit me burg në seancën e parë gjyqësore në ditët në vijim.