Me 97% të kutive të votimit të numëruara, Komisioni Qendror i Zgjedhjeve ka publikuar një pasqyrë të qartë të renditjes së partive politike në zgjedhjet lokale të mbajtura më 12 tetor në Kosovë.

Në garën për kryetarë komunash, Lëvizja Vetëvendosje prin me mbi 210 mijë vota, që përbën rreth 27% të numrit të përgjithshëm të votave. Pas saj renditet Partia Demokratike e Kosovës (PDK) me rreth 194 mijë vota ose 24%, ndërsa Lidhja Demokratike e Kosovës (LDK) mban vendin e tretë me mbi 180 mijë vota, që përbën 22% të totalit.
Në vendin e katërt qëndron Aleanca për Ardhmërinë e Kosovës (AAK) me rreth 73 mijë vota, ose 9% të votave të përgjithshme.

Në anën tjetër, për ulëset në Kuvendet Komunale, LDK del forca e parë me 24% të votave dhe 208 vende të fituara. Pas saj vjen PDK me 22% ose 199 ulëse, ndërsa Vetëvendosje siguron 188 vende, që përfaqësojnë 21% të totalit. AAK ndjek me 98 ulëse, apo 10% të numrit të përgjithshëm të vendeve.

Procesi i numërimit të votave për kandidatët e Kuvendeve Komunale po vijon ende. Deri më tani janë numëruar 200 vendvotime, ndërsa verifikimi i rezultateve preliminare për kryetarë dhe parti do të pasohet nga numërimi i votave të diasporës, votave me kusht dhe atyre të personave me nevoja të veçanta, që do të kryhet në Qendrën e Numërimit dhe Rezultateve.