Indrit Doda është zyrtarisht drejtuesi i ri i Shërbimit të Kontrollit të Brendshëm në Burgje (SHKBB). Emërimi i tij u firmos nga ministri i Drejtësisë, Besfort Lamallari, duke i besuar një prej posteve më të rëndësishme të sigurisë brenda sistemit penitenciar një oficeri me përvojë të gjatë në strukturat e Policisë së Shtetit.

Doda njihet për një karrierë të gjatë dhe të vlerësuar në fushën e sigurisë kombëtare. Ai ka mbajtur më herët detyrën e Koordinatorit në Drejtorinë e Antiterrorit, ku ka qenë i përfshirë në disa prej operacioneve më delikate ndërkombëtare.

Ndër misionet më të spikatura të tij renditet riatdhesimi i shqiptarëve nga kampet në Siri, për të cilin Doda është dekoruar me medalje trimërie. Në atë kohë, ai mbante funksionin e shefit të operacioneve speciale, duke fituar vlerësime të shumta nga strukturat vendase dhe ndërkombëtare të sigurisë.

Indrit Doda është gjithashtu diplomuar në Akademinë e FBI-së në Quantico, Virxhinia (SHBA) dhe njihet si njohës i disa gjuhëve të huaja, çka pritet të kontribuojë në forcimin e bashkëpunimit ndërinstitucional në sistemin e drejtësisë.

Burime pranë Ministrisë së Drejtësisë bëjnë të ditur se emërimi i Dodës synon të forcojë kontrollin, transparencën dhe integritetin në sistemin penitenciar, në një kohë kur qeveria ka shpallur prioritet reformimin e sigurisë në burgje.