Deputetja e Partisë Demokratike dhe kryetarja e Komisionit të Medias dhe të Drejtave të Njeriut, Jorida Tabaku, mori pjesë në konferencën ndërkombëtare të organizuar me rastin e 30-vjetorit të anëtarësimit të Shqipërisë në Këshillin e Europës dhe 35-vjetorit të krijimit të Komisionit të Venecias.

Duke folur në panelin kushtuar drejtësisë kushtetuese, Tabaku theksoi rëndësinë e ekuilibrit midis vullnetit politik dhe kontrollit juridik, duke e cilësuar këtë si “shtyllën themelore të çdo demokracie moderne”.

“Në çdo shtet modern, Kushtetuta është akti më i lartë juridik, dhe mbi këtë themel ngrihet një ekuilibër delikat midis vullnetit politik të shumicës dhe kontrollit juridik të Kushtetutës. Parlamenti është shprehja e sovranitetit të popullit; Gjykata Kushtetuese është garancia që ky sovranitet të ushtrohet brenda kufijve të ligjit dhe të drejtës”, – u shpreh Tabaku.

Ajo falënderoi Komisionin e Venecias për kontributin e tij në mbrojtjen e demokracisë dhe ekuilibrave institucionalë në Shqipëri, duke e cilësuar si “partnerin më të çmuar të demokracisë shqiptare”.

Në fjalën e saj, deputetja opozitare ndali vëmendjen edhe te mungesa trevjeçare e Gjykatës Kushtetuese, të cilën e quajti një “krizë të demokracisë kushtetuese”.

“Reforma në drejtësi, megjithëse u nis me qëllime të mira dhe me kontribut të rëndësishëm nga Partia Demokratike, e la vendin për tri vjet pa Gjykatë Kushtetuese. Në atë kohë Shqipëria ishte një shtet pa arbitër kushtetues. Çdo nismë që prekte balancat e pushtetit mbeti pa testin e kushtetutshmërisë. Dhe siç duket, maxhoranca u mësua pa të.”

Tabaku kujtoi se Komisioni i Venecias e ka cilësuar këtë situatë “të paprecedentë në historinë e drejtësisë kushtetuese”, duke theksuar se mungesa e Gjykatës Kushtetuese dëmtoi rëndin demokratik dhe procesin e integrimit europian të vendit.

“Kur një vend pranon të jetojë pa Gjykatë Kushtetuese, ai rrezikon të jetojë pa demokraci. Një shtet pa Gjykatë Kushtetuese është si një orë pa busull — mund të ecë përkohësisht, por në drejtimin e gabuar.”

Në përfundim të fjalës së saj, Tabaku nënvizoi se pavarësia e institucioneve dhe mbrojtja e balancave kushtetuese janë thelbësore për të ardhmen evropiane të Shqipërisë, duke bërë thirrje që institucionet të qëndrojnë mbi politikën e ditës dhe të mbrojnë frymën e Kushtetutës.