Situata financiare e FC Barcelonës mbetet e ndërlikuar, pavarësisht përpjekjeve të presidentit Joan Laporta për të rikthyer stabilitetin ekonomik në klub.
Sipas raportit zyrtar financiar të publikuar gjatë asamblesë së përgjithshme me anëtarët, katalanasit kanë mbyllur sezonin e kaluar me humbje neto prej 17 milionë eurosh, ndërsa kufizimet e “fair-play financiar” të La Liga-s vijojnë të mbeten një pengesë serioze për veprimtarinë sportive.
Në dokumentin financiar u zbulua se borxhet e Barcelonës ndaj klubeve të tjera europiane për transfertat e fundit kapin shifrën e 159 milionë eurove, të cilat po shlyhen me këste, por përbëjnë ende një barrë të rëndë për buxhetin e klubit.
Detyrimet kryesore të Barcelonës:
• 13 milionë euro ndaj Manchester City për Ferran Torres
• 10 milionë euro ndaj Bayern Munich për Robert Lewandowski
• 19 milionë euro ndaj RB Leipzig për Dani Olmo
• 17 milionë euro ndaj Athletico Paranaense për Vitor Roque
• 24.5 milionë euro ndaj Sevilla për Jules Koundé
• 42 milionë euro ndaj Leeds United për Raphinha
Në listë përfshihen gjithashtu edhe disa borxhe më të vogla ndaj Bordeaux dhe La Brède FC, si dhe 15 milionë euro të tjera në detyrime afatgjata.
Pavarësisht përmirësimeve të dukshme në të ardhurat nga marketingu, turizmi dhe të drejtat televizive, Barcelona vijon të mbetet me bilanc të brishtë financiar.
Joan Laporta pritet të vazhdojë strategjinë e tij për uljen e borxheve dhe krijimin e hapësirës brenda rregullave të “fair-play financiar”, me qëllim që klubi të jetë më konkurrues në tregun e ardhshëm të transferimeve.
“Ne po punojmë për një Barcelonë të qëndrueshme financiarisht dhe të fortë në fushë. Sfida është e madhe, por e domosdoshme për të ardhmen e klubit,” – mësohet të ketë thënë Laporta gjatë asamblesë.
