Miliarderi dhe pronari i Aeroportit të Vlorës, Behgjet Pacolli, ka shpërthyer në akuza ndaj noteres Valbona Selimi, të cilën e cilëson përgjegjëse për “veprime të kundërligjshme dhe falsifikim dokumentesh” në lidhje me transferimin e aksioneve të kompanisë që menaxhon projektin e aeroportit.

Në një deklaratë publike, Pacolli shprehet se as ai dhe as ndonjë person i autorizuar nga kompania “MABCO Construction SA” nuk kanë qenë ndonjëherë në zyrën e noteres Selimi dhe nuk kanë nënshkruar asnjë dokument në praninë e saj.

“Noterja ka përfshirë deklarime të pavërteta në një akt noterial të vitit 2023, ku pretendon se unë kam qenë fizikisht në zyrën e saj, kam nënshkruar dhe më është lexuar dokumenti në prani të një përkthyeseje. Këto janë gënjeshtra të plota,” – deklaron Pacolli.

Ai thekson se akti i përmendur është “element themelor i një veprimtarie të dyshuar të kundërligjshme”, të kryer nga Valon Lluka & Co, që sipas tij tentuan në prill të transferonin 47% të aksioneve, veprim që u zbulua rastësisht më 18 gusht 2025.

“Ky akt i fshehtë është burimi dhe shkaku i gjithë situatës që po përballemi sot,” – shton Pacolli, duke i bërë thirrje organeve kompetente të hetojnë menjëherë falsifikimet e mundshme dhe veprimet e paautorizuara që kanë shkaktuar konfliktin për Aeroportin e Vlorës.