Në Pallatin e Kongreseve po zhvillohen homazhe në nderim të ish-kryeministrit dhe ish-kreut të Partisë Socialiste, Fatos Nano, i cili u nda nga jeta pas një sëmundjeje të gjatë. Që prej orës 8:30 të mëngjesit, qytetarë të shumtë, përfaqësues të lartë të politikës dhe miq të afërt të Nanos kanë mbërritur për t’i dhënë lamtumirën e fundit një prej figurave më të rëndësishme të tranzicionit demokratik në Shqipëri.
Në ceremoni janë të pranishëm familjarët e Fatos Nanos, bashkëshortja Xhoana Nano, djali Sokoli dhe ish-bashkëshortja Rexhina Nano.
Homazhet e personaliteteve shtetërore dhe trupit diplomatik janë planifikuar të zhvillohen nga ora 11:15 deri në 11:45, ndërsa më pas do të mbahen fjalimet përkujtimore, mes tyre edhe ai i kryeministrit Edi Rama.
Në këtë ceremoni marrin pjesë edhe përfaqësues të opozitës, si Fatmir Mediu, Agron Duka, Arjan Ndoja dhe Lulzim Basha, si dhe figura nga rajoni, përfshirë kryeministrin e Kosovës Albin Kurti dhe kryetarin e BDI-së Ali Ahmeti.
Për nder të kontributit të tij në jetën politike të vendit, 2 nëntori është shpallur ditë zie kombëtare. Të gjithë flamujt në institucionet shtetërore do të ulen në gjysmë shtizë, ndërsa në orën 12:00 do të mbahet një minutë heshtje në të gjithë vendin.
Fatos Nano, i cili udhëhoqi Partinë Socialiste për 14 vite dhe shërbeu disa herë si kryeministër, u cilësua nga bashkëkohësit si një personalitet me vizion, guxim dhe ndikim të thellë në politikën moderne shqiptare.
