Një ngjarje e rëndë ka tronditur Britaninë e Madhe të dielën pasdite (2 nëntor), në fshatin Rogit, në juglindje të Uellsit.

Sipas “Daily Mail”, foshnja ndodhej në shtëpinë e një të afërmi së bashku me prindërit, kur u sulmua në mënyrë të papritur nga qeni i familjes. Vogëlushi u gjet i plagosur rëndë dhe, pavarësisht përpjekjeve të ekipeve mjekësore, u shpall i vdekur në vendngjarje menjëherë pas mbërritjes së policisë dhe ambulancës.

Hetimet paraprake dyshojnë se qeni mund të jetë trembur nga fishekzjarrët në zonë, duke reaguar agresivisht ndaj foshnjës. Forcat policore sekuestruan kafshën dhe po verifikojnë nëse ajo i përket një race të ndaluar në Uells.

Autoritetet britanike konfirmuan të hënën pasdite (3 nëntor) se qeni është eutanizuar, ndërsa hetimet për ngjarjen tragjike vijojnë.