Uashington – Republikanët dhe demokratët kanë ndërmarrë mbrëmë vonë hapin e parë konkret drejt miratimit të buxhetit federal dhe përfundimit të mbylljes së qeverisë, që ka zgjatur gati gjashtë javë.

Senati, me mbështetjen e disa demokratëve, votoi 60 pro dhe 40 kundër për të nisur debatet mbi një buxhet të përkohshëm të propozuar nga Dhoma e Përfaqësuesve. Megjithatë, kjo votë nuk i jep fund menjëherë mbylljes së qeverisë.

Aktualisht, republikanët kanë një shumicë të ngushtë në Senat, me 53 nga 100 vende, por për të kaluar votimin procedural duheshin të paktën 60 vota. Shtatë demokratë dhe një senator i pavarur votuan për avancimin e paketës, ndërsa republikani Rand Paul ishte i vetmi që votoi kundër. Ndër ata që votuan “jo” ishte edhe udhëheqësi i pakicës demokrate në Senat, Chuck Schumer.

Senatori demokrat Tim Kaine, i cili votoi pro, shkroi në platformën X se marrëveshja përfshin uljen e kontributeve të sigurimeve shëndetësore, një kërkesë e kahershme e demokratëve. Paketa gjithashtu parashikon rikthimin në punë të punonjësve federalë të pushuar gjatë mbylljes, si dhe pagesën e pagave të prapambetura.

Për shkak të mosmarrëveshjeve mes demokratëve dhe republikanëve mbi buxhetin, pjesa më e madhe e funksioneve të qeverisë ka qenë e paralizuar që nga fillimi i tetorit. Tani, projektligji duhet të miratohet sërish nga Dhoma e Përfaqësuesve, ku procesi mund të zgjasë disa ditë në varësi të kundërshtimeve brenda të dyja partive.