Uashington – Senati amerikan miratoi një marrëveshje që synon t’i japë fund mbylljes më të gjatë në historinë e qeverisë amerikane, duke hapur rrugën për zgjidhjen e bllokimit.

Pas negociatash gjatë fundjavës, një pjesë e demokratëve iu bashkuan republikanëve dhe votuan në favor të marrëveshjes së kompromisit. Ky votim përbën hapin e parë procedural drejt miratimit të planit për financimin e qeverisë, e cila ka qenë pa fonde që prej 1 tetorit, raporton BBC.

Megjithatë, marrëveshja duhet të kalojë edhe disa etapa të tjera, përfshirë votimin në Dhomën e Përfaqësuesve, përpara se shërbimet federale dhe punonjësit të rikthehen plotësisht në punë. Zhvillimi i sotëm shihet si sinjali i parë serioz i përparimit pas 40 ditësh ngërç.

Mbyllja ka ndikuar në mënyrë të ndjeshme jetën publike në SHBA: shumë shërbime qeveritare janë pezulluar, rreth 1.4 milionë punonjës federalë ndodhen në pushim të detyruar ose po punojnë pa pagesë, ndërsa janë prekur edhe udhëtimet ajrore dhe përfitimet ushqimore për rreth 41 milionë amerikanë me të ardhura të ulëta.