Gazetari i njohur për çështjet e sigurisë ka dhënë detaje të reja për marrëdhënien mes Gilmando Danit, i vrarë gjatë atentatit pranë Aeroportit të Rinasit, dhe Muçi Shaljanit (i njohur si Sheqeri), agjent i AMP-së, i cili u plagos rëndë në ngjarje.

Sipas tij, Dani dhe Shaljani kishin një shoqëri të hershme, ndërsa hyrja e Shaljanit në radhët e AMP-së nuk ishte për të luftuar krimin, por për të përfituar stendën e Ministrisë së Brendshme dhe lejen për t’u pajisur me armë, gjë që e lejonte atë të shoqëronte eksponentë të krimit të jetë i armatosur dhe të mos ketë pengesa në qarkullim.

Gazetari shtoi se ky fenomen nuk ishte i izoluar: në rrjetin e krimit kanë qenë të përfshirë edhe individë të tjerë, duke përfshirë persona si Jeton Lamin dhe shefin e komisariatit të Lacit që më pas u arrestua, si dhe policë të tjerë që mbanin kontakte me elementë kriminalë.

“Sot ishte lajm prezenca e Shaljanit, por nuk ishte për t’u çuditur. Pavarësisht se ministrja e trumbetoi që krimi ishte ulur, një orë më pas erdhi goditja mafioze”, tha gazetari, duke nënvizuar se ngjarja tregon madhësinë e rrjetit të lidhjeve mes elementëve të krimit dhe individëve brenda institucioneve të sigurisë.

Në ngjarje, Gilmando Dani humbi jetën si pasagjer, ndërsa Shaljani, shoferi i tij, ndodhet në spital në gjendje të rëndë. Makina e djegur tip “Toyota” dhe armët e gjetura tregojnë se atentati ishte i planifikuar dhe profesional, duke theksuar seriozitetin e rrjetit kriminal që vepronte pranë Aeroportit të Rinasit.