Instituti i Gjeoshkencave, Energjisë, Ujit dhe Mjedisit ka lëshuar një paralajmërim të rëndësishëm për pasditen e sotme dhe ditën e nesërme, duke njoftuar se reshjet me intensitet të lartë dhe shtrëngatat afatshkurtra mund të shkaktojnë probleme në disa zona të vendit. Rreziku kryesor lidhet me vërshimet e ujit në mjediset urbane, të cilat varen nga kapaciteti i rrjeteve të kanalizimeve në qarqet Shkodër, Lezhë, Durrës, Elbasan, Vlorë dhe Gjirokastër.

Sipas llogaritjeve hidrologjike të IGJEO-s, reshjet e ditëve të fundit, të cilat pritet të vijojnë deri të dielën, 23 nëntor, do të sjellin rritje të ndjeshme të prurjeve në lumenjtë e mëdhenj dhe të mesëm Mat, Shkumbin, Seman dhe Vjosa. Instituti paralajmëron se situata kërkon vëmendje të shtuar, sidomos në zonat pranë shtretërve lumorë.

Parashikimi i motit tregon reshje mesatare deri lokalisht intensive në qarqet Shkodër, Lezhë, Durrës, Elbasan, Vlorë dhe Gjirokastër, ndërsa në Kukës, Dibër dhe Tiranë pritet një intensitet mesatar. Qarqet Fier, Berat dhe Korçë pritet të përballen me reshje të dobëta deri lokalisht mesatare. Në të gjithë territorin reshjet do të shoqërohen nga shtrëngata, sipas specifikimeve të IGJEUM.

Temperaturat për nesër do të variojnë:
• Në bregdet: 4 / 11°C
• Në zonat e ulëta: 9 / 11°C
• Në zonat malore: 4 / 8°C

Ndërkohë, era pritet të fryjë mesatare deri e fortë, kryesisht përgjatë vijës bregdetare, duke kontribuar në përkeqësimin e kushteve atmosferike.