Reagime të forta janë ndezur në rrjetet sociale pas publikimit të pamjeve ku banorja 18-vjeçare e “Big Brother VIP Kosova 4”, Elijona Binakaj, shihet nën presion dhe bullizëm të vazhdueshëm nga banoret Alba Pollozhani dhe Benita Zena. Situata kulmoi me një deklaratë të rëndë, kur Benita i përmendi të resë nënën e ndjerë, duke i thënë: “Nuk e ka mamin këtu për ta mbrojtur”, fjali që ka shkaktuar tronditje të gjerë dhe reagim të menjëhershëm nga familja e Elijonës.

Përplasja verbale dhe tensioni brenda shtëpisë kanë nxitur debate të ashpra në publik, ndërsa formatit i janë adresuar akuza për mungesë kontrolli dhe tolerim të sjelljeve që normalizojnë dhunën psikologjike.

Në mesin e kritikëve është edhe këngëtarja Dafina Zeqiri, e cila ka shpërthyer hapur kundër programit. Në një koment publik, artistja shprehu indinjatën e saj të thellë, duke thënë: “Është e tmerrshme që Big Brother lejohet ende me ekzistu. Kur bullizimin, dhunën fizike dhe psikike e shfaqin si argëtim. TV duhej të ishte i sigurt për fëmijë, jo të normalizojë dhunë. Ku po shkon ky vend që këtë e lejon vit pas viti?”

Zëri i Zeqirit i është bashkuar një vale të gjerë reagimesh nga personazhe publikë dhe qytetarë që kërkojnë masa urgjente nga produksioni dhe ndërhyrje nga autoritetet rregullatore për të ndalur praktikat që cenojnë integritetin e pjesëmarrësve.