Një incident ka alarmuar autoritetet shëndetësore dhe policore në Tiranë, pasi një paciente 56-vjeçare ka pësuar një reaksion nga një injeksion i aplikuar në banesë. Policia e kryeqytetit njofton se një mjeke dhe një infermiere në pension janë vënë nën hetim në gjendje të lirë.

Sipas njoftimit zyrtar, procedimi penal filloi pas dërgimit të pacienteës në spital për shkak të komplikimeve nga medikamenti i marrë. Hetimet paraprake tregojnë se mjekimi i ishte përshkruar nga shtetasja E. H., 46 vjeçe, me profesion mjeke, ndërsa injeksionin e aplikoi në banesë shtetasja A. T., 71 vjeçe, infermiere dhe aktualisht në pension.

Pacientja ndodhet aktualisht nën kujdesin e mjekëve, ndërsa autoritetet po vijojnë hetimet për të përcaktuar shkaqet e sakta të reagimit dhe për të marrë masat e nevojshme ligjore ndaj të dyshuarave.

Autoritetet i bëjnë thirrje publikut të jetë i kujdesshëm me injeksionet dhe shërbimet mjekësore të ofruara jashtë institucioneve spitalore.