Finalja e Miss Universe 2025 u shënua nga një situatë e paprecedentë për Shqipërinë. Përfaqësuesja zyrtare, Flavia Harizaj, nuk u shfaq në skenë, duke lënë vendin pa asnjë prezencë në garën më të madhe të bukurisë në botë. Mungesa e saj pa paralajmërim apo njoftim publik shkaktoi reagime të shumta në rrjetet sociale dhe u konsiderua si një veprim joprofesional.

Vetëm pas kritikave në media dhe rrjetet sociale, Harizaj reagoi me dy postime në Instagram Story, duke sqaruar vendimin e saj. Në mesazhin e parë, ajo theksoi se jetës private i jep prioritet mbi çdo titull apo skenë botërore, duke përmendur qetësinë, dashurinë e njerëzve të afërt dhe lumturinë në momentet e thjeshta.

Në postimin e dytë, Flavia sqaron se çdo vendim për mungesën e saj ishte personal dhe nuk ndikoi askush tjetër. Ajo thekson presionin e garës dhe rëndësinë e mbështetjes së një ekipi profesionist për të përballuar sfidat e një eventi kaq të madh.