Tirana – Kryeministri Edi Rama, në konferencën e përbashkët me komisioneren e BE, Marta Kos, gjatë çeljes së samitit “Plani i rritjes, rruga drejt BE”, theksoi se Ballkani Perëndimor nuk duhet të jetë spektator, por një faktor aktiv në Europë.
“Ballkani Perëndimor po ecën nga rreziku drejt mundësisë. Nuk po kërkojmë lëmoshë, po po tregojmë se jemi gati. Nuk ka Europë të fortë me një Ballkan të dobët,” tha Rama, duke nënvizuar rëndësinë e kontributit rajonal për ekonominë dhe sigurinë e Europës.
Kryeministri u ndal edhe te identiteti dixhital rajonal, që do të nisë vitin e ardhshëm, duke e konsideruar si një hap të rëndësishëm drejt integrimit të plotë të vendit në BE dhe për përmirësimin e lëvizjes, tregut dhe investimeve.
Rama gjithashtu vuri theksin te reforma dhe rezultatet konkrete, duke theksuar se Ballkani Perëndimor do të hyjë në BE si kontribues, jo si i ftuar.
