Tiranë – Komisionerja e BE, Marta Kos, gjatë fjalës së saj në samitin e Planit të Rritjes, theksoi se vendet e Ballkanit Perëndimor janë pjesë e Europës, por duhet të përshpejtojnë reformat dhe të shfrytëzojnë fondet e premtuara.

“Nga paketa 6 miliardë euro për rajonin, vetëm 400 milionë euro janë shpërndarë deri tani. Dy vendet më të avancuara kanë miratuar vetëm rreth 50% të reformave të dakordësuara, ndërsa dy vende të tjera nuk kanë filluar ende zbatimin,” tha Kos, duke nënvizuar nevojën për integrim të plotë në fusha të ndryshme të politikave të BE.

Komisionerja gjithashtu theksoi përfitimet për qytetarët nga instrumenti SEPA dhe u shpreh se BE duhet të jetë një realitet i prekshëm: “Ballkani Perëndimor i përket BE si anëtarë të barabartë dhe duhet të angazhohet për të bërë më shumë në këtë rrugë.”