Kreu i SPAK, Altin Dumani, gjatë vizitës së tij zyrtare në Bruksel në Qendrën Europiane të Politikave, ka bërë një bilanc të gjashtë viteve të funksionimit të prokurorisë së posaçme, duke folur për sukseset, por edhe sfidat që ka hasur institucionin që synon të jetë model i reformës në drejtësi në Shqipëri.

Dumani theksoi se zhvillimi i SPAK-ut është ndërtuar mbi pavarësinë, profesionalizmin, qëndrueshmërinë institucionale, bashkëpunimin ndërkombëtar dhe besimin e publikut. Megjithatë, sipas tij, sfidat kanë qenë të shumta, duke përfshirë organizimin e institucioneve, pritshmëritë e mëdha të publikut dhe presionet e ndryshme që vijnë nga politika, media dhe krimi i organizuar.

“Vështirësitë kanë qenë të shtumta. Ne në dhjetor mbushim 6 vjet. Vështirësitë kryesore kishin të bënin me organizimin e institucioneve. Një tjetër vështirësi ishte menaxhimi i presioneve dhe kërcënimeve të ndryshme që vinin drejt prokurorisë dhe prokurorëve të posaçëm, nga politika, nga media, por sidomos nga krimi i organizuar. Megjithatë, prokurorët e SPAK-ut kanë përvojë dhe janë të përgatitur për t’i përballuar këto presione”, tha Dumani.

Ai shtoi se secili prokuror i SPAK-ut ka përvojë të admirueshme dhe është profesionalisht i maturuar, duke e bërë institucionin të fortë edhe përballë sfidave më të vështira.