Kreu i grupit parlamentar të Partisë Demokratike, Gazment Bardhi, deklaroi gjatë tubimit para Kryeministrisë se fokusi i foltores së opozitës është t’u japë zë qytetarëve dhe shqetësimeve të tyre.

“Kjo foltore është për të dëgjuar fjalën e qytetarëve dhe besoj se në çdo foltore do të dëgjohen zëra të ndryshëm që do na bashkohen për të shprehur shqetësimet e tyre. Sot, për shembull, do të jenë minatorët e Spaçit,” u shpreh Bardhi.

Ai shtoi se strategjia e mëtejshme e opozitës do të vendoset nga kryesia e PD-së, ndërsa nënvizoi se foltorja synon të kthehet në një platformë të hapur për çdo zë kritik.

Ndërkohë, deputeti Saimir Korreshi u shpreh ashpër ndaj qeverisë:
“Presim që të gjithë hajdutët e fondeve të qytetarëve të futen në burg dhe sigurisht largimin e tyre nga qeveria,” tha ai, duke theksuar se aksioni opozitar do të vazhdojë.