Deputeti i Partisë Demokratike, Luan Baçi, foli para nisjes së Foltores së opozitës përballë Kryeministrisë, duke theksuar se iniciativa vjen pas bllokimit të krijuar në Parlament për deputetët e opozitës.

Sipas tij, foltoreja do të jetë një pikë referimi për qytetarët, ku ata mund të shpalosin problemet dhe shqetësimet e tyre, ndërsa më vonë kjo do të evoluojë në një “ortek të madh”.

“Është një foltore e organizuar nga PD. Kjo emërtesa e protestës nuk ka vend, sepse protestat organizohen në format tjetër. Është vendosur që kjo foltore të jetë e përjavshme, por më pas do të shikohet edhe në varësi të situatës. Pra një foltore për të plotësuar atë bllokim dhe boshllëk që krijohet në Parlament për deputetët. Po këtu është një foltore për qytetarët në radhë të parë, për të ardhur dhe shpalosur gjithë problematikat, hallet dhe shqetësimet, si dhe për të qenë si një pikë referimi, nga ku në vazhdimësi të bëhet si një ortek sa më i madh,” tha Baçi.

Ai u ndal edhe tek pasojat e përmbytjeve në zona si Vjosa dhe Semani, duke kërkuar që qeveria të zbresë në terren dhe të dëmshpërblejë fermerët për dëmet e shkaktuara nga uji.