Në protestën e radhës të Partisë Demokratike para Kryeministrisë, e quajtur “Foltorja 2”, deputeti Saimir Korreshi bëri thirrje të forta ndaj qeverisë së kryeministrit Edi Rama, duke akuzuar atë dhe kabinetin për korrupsion të thellë.

“Jam mësuar të flas gjithmonë në Parlament përpara hajdutëve dhe do më ndjeni nëse kam ndonjë emocion të madh përpara jush. Ka ardhur dita që prangat t’i varen në mes të këtij sheshi nga ju. Të dashur nëna që flini gjumë me fotot e fëmijëve që janë larguar, të dashur minatorë që jeni ngritur në grevë dhe protestoni për statusin tuaj. Të dashur vëllezër dhe motra që nuk gjeni kura në spitale, ka vetëm një fjalë dhe kjo është ‘Rama ik’,” tha Korreshi.

Ai shtoi se qeveria aktuale ka shkuar nga 40 në 400 hajdutë, duke theksuar se “Rama ik, po me atë tunel korrupsioni që të ka zhytur brenda. Nuk mund të trajtohet buxheti i shtetit si lekët e tyre. Është dita jonë, këtyre ministrave që vjedhin qytetarët ditë pas dite. Rama ik me gjithë tabor”.

Foltoreja e opozitës vijon të përdoret si platformë për të shprehur pakënaqësinë ndaj qeverisë dhe për të mobilizuar mbështetësit në rrugë.