Në kujtim të 15-vjeçarit Martin Cani, i cili humbi jetën një vit më parë pas një konflikti mes bashkëmoshatarësh, pranë një fushe sportive u vendos dje një stol përkujtimor, si simbol reflektimi dhe thirrje për më shumë siguri për fëmijët. Stoli mban një pllakë metalike me portretin e Martin Canit, të realizuar me lazer, duke krijuar një vend homazhi për familjen, komunitetin dhe të rinjtë që e kanë njohur.

Nismën e ndërmori grupi Prindërit për Arsim Cilësor, të cilët bënë me dije se janë në pritje të aprovimit të Bashkisë së Tiranës dhe Zyrës Vendore Arsimore për vendosjen e një stoli të dytë në oborrin e shkollës “Fan Noli”, ku Martin Cani ka studiuar.

Në njoftimin e tyre, prindërit theksuan se vendosja e stolit më 28 Nëntor nuk ishte e rastësishme.
“Zgjodhëm këtë datë simbolike, sepse atdhedashuria fillon me dashurinë për tjetrin. Ngjarja e Martinit është një kujtesë e dhimbshme dhe një thirrje për më shumë përgjegjësi ndaj fëmijëve tanë,” thuhet në deklaratë.

Ata u zotuan se do të vazhdojnë të kërkojnë kushte më të mira sigurie në shkolla dhe të ringrejë ndjeshmërinë e shoqërisë për mbrojtjen e fëmijëve. Grupimi falënderoi gjithashtu Larashi Shpk dhe Prosafety Shpk për kontributin në realizimin e stolit dhe pllakës përkujtimore.

Rasti i Martin Canit, i ndodhur më 18 nëntor një vit më parë, tronditi opinionin publik. I mituri humbi jetën pasi u godit me thikë nga një bashkëmoshatar gjatë një sherri. Prokuroria e Tiranës ka kërkuar 25 vite burg për autorin e dyshuar, por sipas Kodit Penal për të Miturit, dënimi nuk mund të tejkalojë 12 vite burg.

Stoli përkujtimor pritet të shndërrohet në një vend simbolik reflektimi, ndërsa familja e Martin Canit dhe komuniteti presin ende përgjigjen për vendosjen e tij edhe në ambientet e shkollës.