Gjykata e Beogradit ka vendosur të zgjasë për 30 ditë paraburgimin e ish-pjesëtarit të UÇK-së dhe shtetasit të Kosovës, Avni Qenaj, një vendim i konfirmuar nga avokati i tij mbrojtës, Xhevdet Smakiqi. Ky i fundit e ka cilësuar masën si “privim të kundërligjshëm të lirisë” dhe ka akuzuar autoritetet kosovare për mungesë veprimi dhe presioni diplomatik.

Sipas Smakiqit, Serbia po shkel pa pasoja marrëveshjet e Brukselit, duke penguar lirinë e lëvizjes dhe duke marrë në shënjestër ish-pjesëtarët e UÇK-së. Ai theksoi se paraburgimi i Qenajt po vazhdon pa asnjë provë konkrete, ndërsa reagimi institucional nga Prishtina ka munguar.

“Në mungesë të një qeverie serioze të Kosovës, vazhdojnë kidnapimet e ish-pjesëtarëve të UÇK-së. Serbia shkel marrëveshjet me lehtësi dhe askush nuk i kërkon llogari,” ka deklaruar avokati, duke shtuar se një presion diplomatik i mirëfilltë do të kishte mundësuar lirimin e klientit të tij.

Ndërkohë, familja e Avni Qenajt po përballet e vetme me betejën ligjore, në një periudhë festash kombëtare që për ta po kalon nën ankth dhe pasiguri. “Familja është e braktisur nga shteti dhe po lufton vetë përmes angazhimit privat me avokatët,” theksoi Smakiqi.

Ai shprehu bindjen se pafajësia e Qenajt do të vërtetohet, por ngriti akuza të forta ndaj institucioneve të Kosovës për mosmbrojtjen e qytetarëve të saj.
“Liri për Avni Qenaj — dhe gëzuar 28 Nëntorin në qelinë e Beogradit, ku po mbahet i kidnapuar në kundërshtim me konventat ndërkombëtare,” përfundoi avokati.

Ngjarja po shkakton reagime dhe shqetësim të shtuar në Kosovë, ndërsa mbetet në pritje një përgjigje zyrtare më e fortë nga institucionet.