Këngëtari Erik Lloshi ka shprehur indinjatën e tij të thellë për disa komente që i janë bërë pas pjesëmarrjes në emisionet televizive ku nderoi dhe kujtoi mikun e tij të ndjerë, artistin Shpat Kasapi.

Në një intervistë, Lloshi tregoi se menjëherë pas ndarjes nga jeta të artistit 40-vjeçar, ai ishte i ftuar në një emision, ku emocionet e tij nuk mund të kontrolloheshin dhe lotët dolën natyrshëm.

Megjithatë, prapaskenave të emisionit, këngëtarit i janë bërë komente të tilla si:
“Sa bukur qaje” dhe madje i janë bërë ftesa të tjera që “të qaj” sërish për mikun e ndjerë.

Këto fraza i kanë shkaktuar revoltë dhe irritim, pasi Lloshi e ka konsideruar më se të papranueshme mënyrën se si disa gazetarë mund të flasin për një humbje kaq të dhimbshme:
“Është e trishtë dhe e papranueshme të shndërrohet dhimbja e vërtetë në një spektakël për të kënaqur publikun apo për komente të pahijshme,” tha ai.

Këngëtari ka theksuar se kujtimi i Shpat Kasapit duhet të jetë një akt nderimi dhe respekti, dhe jo një subjekt për tallje apo shaka mbi emocionet njerëzore.