Kryetari i “Lëvizja Bashkë”, Arlind Qori, ka deklaruar se zgjedhja e Endri Shabanit në postin e Avokatit të Popullit është rezultat i një “marrëveshjeje më të gjerë mes Edi Ramës dhe Sali Berishës”, e cila sipas tij mund të ketë pasoja serioze për Reformën në Drejtësi.

“Endri Shabanin nuk e ka bërë Avokat Populli vetëm Edi Rama. E ka bërë Edi Rama me Sali Berishën dhe kjo është pjesë e një marrëveshjeje më të gjerë Rama–Berisha, që do prekë, kam frikë unë, Reformën në Drejtësi, për t’i pamundësuar SPAK-ut që të pezullojë nga detyra dhe të marrë masa paraburgimi për politikanët e korruptuar”, u shpreh Qori.

Ai theksoi se Shabani është pjesë e një koalicioni ku përfshihet edhe Sali Berisha dhe forca të tjera opozitare, duke përjashtuar “Lëvizjen Bashkë”. “Sot që flasim, Shabani është anëtar i një koalicioni ku bën pjesë edhe zoti Berisha. Kur kandidoi zoti Binaj, Shabani, Lapaj dhe Berisha ishin pjesë e një koalicioni. De facto e kanë në koalicion të gjithë”, tha Qori.

Sipas tij, pavarësisht retorikës publike, aleanca mes palëve është faktike. “Mund ta shajnë sa të duan, por e kanë në koalicion. Shabani u zgjodh me votat e dyshes Rama–Berisha”, përfundoi Qori.