Një aksident rrugor është regjistruar ditën e sotme në autostradën Lushnje–Fier, në afërsi të zonës së njohur si “Pushimi i Shoferit”, si pasojë e një parakalimi të gabuar.

Sipas Policisë së Qarkullimit Rrugor, dy automjete janë fërkuar me njëri-tjetrin gjatë tentativës për parakalim, teksa të dyja po lëviznin në drejtim të Fierit. Për pasojë, një automjet tip fuoristradë “Volvo” ka dalë nga korsia dhe ka përfunduar e bllokuar mes barrierave ndarëse të kaheve të lëvizjes.

Menjëherë pas ngjarjes, policia ka mbërritur në vendin e aksidentit, duke dokumentuar rastin dhe duke marrë masa për disiplinimin e trafikut, i cili u rëndua për disa minuta. Në ndihmë kanë shkuar edhe dy autoambulanca, por fatmirësisht nuk raportohet për persona me lëndime serioze.

Autoritetet u bëjnë apel drejtuesve të mjeteve që të tregojnë kujdes të shtuar në autostradë dhe të respektojnë rregullat e qarkullimit rrugor, për të shmangur aksidente që mund të kenë pasoja të rënda.