Kënga “Nan” e artistit Alis u shpall fituese e Festivalit të 64-të të Këngës në RTSH, duke i dhuruar një moment të paharrueshëm artistit. Fitorja u vendos përmes një kombinimi të votave të jurisë profesioniste dhe votave me SMS nga Shqipëria dhe Kosova.
Pas shpalljes së rezultatit në Post Fest 64, Alis ndau emocionet e tij:
“Jam njeriu më i lumtur në botë dhe nuk më besohet akoma. Më është bërë ëndrra realitet dhe qershia mbi tortë ishte përqafimi i publikut që nuk e prisja të ishte në këtë masë. Ishte një surprizë dhe kam mbetur pa fjalë.”
Në vendin e dytë u rendit Inis Neziri me këngën “Ta kam fal”, ndërsa vendin e tretë e mori Sheila me “Zemra e tokës”. Në vendin e katërt u pozicionua dueti Fifi & Tiri Gjoci me këngën “Rri”, dhe top 5-shja u plotësua nga Vedat Ademi me këngën “Kur fjala mbaron”.
Me fitoren e Alisit, Shqipëria do të përfaqësohet në Eurovision Song Contest 2026, që do të zhvillohet në Vjenë, Austri, më datat 12, 14 dhe 16 maj, pas triumfit të JJ me këngën “Wasted Love” vitin e kaluar.
