Një valë e fuqishme moti ka shkaktuar vonesa dhe anulime masive fluturimesh në Shtetet e Bashkuara, duke goditur aeroportet kryesore në një periudhë të ngarkuar udhëtimesh për festat e fundvitit. Sipas të dhënave nga FlightAware dhe Shërbimi Kombëtar Meteorologjik (NWS), më shumë se 1.300 fluturime janë anuluar dhe mbi 4.200 të tjera janë vonuar gjatë ditës së djeshme.
Zonat më të prekura janë Nju Jorku dhe Çikago. Në Nju Jork dhe shtetin fqinj të Nju Xhersit, parashikohet që trashësia e borës të arrijë deri në 20 centimetra në disa zona. Reshje të dendura bore priten gjithashtu në rajonin e Maleve Shkëmbore, ndërsa në zonën e Liqeneve të Mëdha do të ketë reshje të përziera shiu dhe bore.
Fenomeni i njohur si “lumi atmosferik”, që ka shkaktuar përmbytje në Kaliforni, pritet të dobësohet drejt fundit të ditës, por autoritetet paralajmërojnë qytetarët të jenë të kujdesshëm dhe të kufizojnë lëvizjet.
“Këshillohet që të shmanget përdorimi i automjeteve, kur është e mundur, dhe të përdoret transporti publik,” deklaroi kryetari i Bashkisë së Nju Jorkut, Eric Adams, duke theksuar rëndësinë e kujdesit për sigurinë e qytetarëve.
