Ish-deputeti i Partisë Socialiste, Petro Koçi, ka komentuar sot zhvillimet e fundit politike dhe hetimet e SPAK ndaj zëvendëskryeministres Belinda Balluku, duke vënë theksin tek ndikimi moral dhe politik që këto raste kanë mbi mazhorancën.

Në një intervistë televizive, Koçi theksoi se kur vihet në diskutim integriteti i një figure të lartë qeveritare, pasojat nuk janë vetëm juridike, por edhe morale. Ai u ndal edhe te afera e AKSHI-t dhe përfitimet e dyshimta nga tenderat në këtë institucion, duke theksuar se këto zhvillime rëndojnë më tej situatën për qeverinë.

“Kur vihet në diskutim integriteti moral i një figure në qeveri, kjo ndikon moralisht. Këtu ka qëlluar edhe afera e AKSHI-t dhe zhvillimet skandaloze që lidhen me personazhe që kanë përfituar tendera në këtë institucion,” deklaroi Koçi.

Megjithatë, ish-deputeti socialist vlerësoi se hetimet dhe zbulimet e SPAK-it, përfshirë mesazhet e Evis Berberit dhe regjistrimet nga zyra e Ergys Agasit, përbëjnë një fitore të rëndësishme për drejtësinë dhe interesin publik.

“Këto janë zbulime shumë të rëndësishme për një drejtësi që po bëhet më efikase, ndonjëherë pikërisht falë këtyre ngjarjeve,” shtoi Koçi, duke nënvizuar se, edhe pse mund të ketë kosto politike për Partinë Socialiste në afat të shkurtër, përfitimet për funksionimin e drejtësisë janë të konsiderueshme.