Presidenti ukrainas Volodymyr Zelensky do të zhvillojë këtë të diel një takim me Presidentin amerikan Donald Trump në Florida, ku diskutimi kryesor do të përqendrohet tek çështjet territoriale dhe pengesat kryesore për t’i dhënë fund luftës në Ukrainë. Një kornizë paqeje me 20 pika dhe një marrëveshje për garanci sigurie janë afër finalizimit, sipas burimeve zyrtare.

Zelensky njoftoi se gjatë bisedimeve do të trajtohen temat më të ndjeshme, duke përfshirë situatën në Donbas dhe centralin bërthamor të Zaporizhzhisë, si dhe çështje të tjera të sigurisë. Ai shtoi se shpreson të arrijë dakordësi mbi kornizën e paqes dhe se është i gatshëm ta çojë atë në referendum në Ukrainë, nëse Rusia pranon armëpushimin.

Nga ana tjetër, Moska kërkon të ketë kontroll të plotë mbi rajonin e Donbasit, përfshirë Donetskun dhe Luhanskun, ndërsa Kievi synon të ndalë luftime në vijat aktuale të frontit. Takimi shihet si një hap vendimtar në përpjekjet diplomatike të SHBA-së për të sjellë paqe në konfliktin më të përgjakshëm në Evropë që nga Lufta e Dytë Botërore.