Qytetarët e Vlorës po përballen prej disa ditësh me mungesën e furnizimit me ujë të pijshëm, një situatë që ka shkaktuar pakënaqësi të forta, veçanërisht në prag të festave të fundvitit.

Revolta e banorëve kulmoi ditën e djeshme me një protestë të organizuar në ambientet e Teatrit “Petro Marko”, ku Bashkia e Vlorës kishte organizuar një aktivitet festiv për punonjësit e saj. Protestuesit hynë në ambientet e teatrit dhe ndërprenë shfaqjen, duke kërkuar me ngulm zgjidhje për mungesën e ujit.

“Duam ujë”, ishte thirrja e qytetarëve, ndërsa situata u tensionua për disa momente edhe me forcat e policisë që ndodheshin në vend për të siguruar mbarëvajtjen e aktivitetit të bashkisë.

Banorët shprehen të vendosur se nuk do të tërhiqen, duke e cilësuar mungesën e ujit si një problem serioz dhe të papranueshëm. Ata kanë paralajmëruar një tjetër protestë ditën e sotme, në orën 10:00, këtë herë përpara godinës së Bashkisë së Vlorës.

Nga ana tjetër, drejtori i Ujësjellësit të Vlorës, Ermal Murati, ka deklaruar se defekti ende nuk është riparuar. Sipas tij, po punohet intensivisht për gjetjen e një rruge alternative të furnizimit, ndërsa nuk është dhënë ende një afat i saktë se kur pritet normalizimi i situatës.

Ndërkohë, qytetarët kërkojnë përgjegjësi dhe një zgjidhje të menjëhershme, duke theksuar se mungesa e ujit po u vështirëson ndjeshëm jetën e përditshme.