Kryeministri Edi Rama ka reaguar për situatën e rënduar të furnizimit me ujë në Vlorë, përmes një deklarate të publikuar në rrjetet sociale. Ai bëri të ditur se pjesët e reja hidraulike për riparimin e defektit të rëndë në ujësjellës po transportohen urgjent drejt Shqipërisë nga Stambolli.

Sipas Ramës, shkaku i avarisë lidhet me instalime të kryera në vitet 2009–2010, ku janë përdorur pjesë hidraulike jashtë standardeve, të cilat “nuk e kanë mbajtur dot më presionin e ujit dhe për pasojë tubacioni ka shpërthyer”.

Kryeministri vlerësoi punën e punëtorëve të ujësjellësit të Vlorës, duke theksuar se operacioni i riparimit po drejtohet nga drejtori i përgjithshëm i Agjencisë Kombëtare të Ujësjellës-Kanalizimeve, inxhinieri Flauers Shoshi, i cili ndodhet prej ditësh në terren.

“Po bëjnë të pamundurën për ta mbyllur këtë plagë të hapur në trupin e Vlorës prej një mine të vjetër,” shkruan Rama, duke e cilësuar situatën si pasojë të problemeve të trashëguara.

Në fund të deklaratës, kreu i qeverisë u kërkoi ndjesë qytetarëve të Vlorës për vështirësitë e shkaktuara, duke shtuar se kjo peripeci është e pamerituar dhe duke përdorur një ton simbolik për të shprehur optimizëm për tejkalimin e situatës.