Një zjarr i përmasave të konsiderueshme ka përfshirë në orët e para të mëngjesit një njësi shërbimi në fshatin Xhyrë, pranë aksit nacional Librazhd–Përrenjas, duke shkaktuar dëme të mëdha materiale.

Sipas njoftimit zyrtar të MZSH Librazhd, shërbimet zjarrfikëse u njoftuan rreth orës 03:29 dhe ndërhynë menjëherë në vendngjarje. Në operacion morën pjesë dy automjete zjarrfikëse dhe 10 efektivë, të cilët arritën të neutralizojnë flakët dhe të parandalojnë përhapjen e mëtejshme të zjarrit.

Si pasojë e flakëve, u dogj plotësisht një kioskë në pronësi të shtetasit Skënder Gega, banues në fshatin Xhyrë të Njësisë Administrative Hotolisht, bashkia Librazhd, si dhe dy automjete të parkuara pranë saj. Ndërkohë, ndërhyrja në kohë e zjarrfikësve bëri të mundur shpëtimin e dy kioska të tjera dhe një automjeti tjetër që ndodheshin në afërsi të vatrës së zjarrit.

Burime nga MZSH bëjnë me dije se shkaku i zjarrit mbetet ende i paqartë, por nuk përjashtohet mundësia e një zjarrvënieje të qëllimshme. Mes automjeteve të shkrumbuara raportohet se ndodhet edhe një mjet me targa greke, në pronësi të një emigranti që ishte kthyer në vendlindje për festat e fundvitit.

Fatmirësisht, nga ngjarja nuk raportohet për persona të lënduar. Në vendngjarje kanë mbërritur edhe shërbimet e Policisë së Shtetit, të cilat kanë nisur hetimet për zbardhjen e plotë të rrethanave dhe shkaqeve të zjarrit.