Një lajm i mirë për përdoruesit e Gmail që janë lodhur ose ndihen në siklet me adresën e tyre aktuale të email-it: Google pritet të lejojë ndryshimin e adresës pa humbur mesazhet dhe dokumentet ekzistuese.

Sipas raportimit të 9to5Google, kompania po mundëson për të gjithë përdoruesit ndryshimin e adresës së email-it të lidhur me llogarinë Google, duke e zëvendësuar atë me një adresë të re që përfundon me @gmail.com. Ky ndryshim do të bëhet pa prekur përmbajtjen e llogarisë, përfshirë email-et, kontaktet dhe dokumentet e ruajtura.

Edhe pas ndryshimit, adresa e vjetër e Gmail-it do të vazhdojë të funksionojë dhe përdoruesit do të kenë mundësi të identifikohen në llogarinë e tyre duke përdorur të dyja adresat. Megjithatë, Google parashikon një kufizim: pas këtij veprimi, nuk do të lejohet krijimi i adresave të reja Gmail të lidhura me të njëjtën llogari për një periudhë prej 12 muajsh.

Nga ana tjetër, përdoruesit që tashmë kanë një adresë që përfundon me @gmail.com nuk do të kenë mundësi ta ndryshojnë atë. Në këto raste, alternativa mbetet ndryshimi i emrit të shfaqur në llogari ose hapja e një adrese të re Gmail, me transferim manual të email-eve dhe kontakteve.

Risia pritet të lehtësojë shumë përdorues që prej vitesh janë të lidhur me adresa të vjetra ose jo të dëshiruara, duke u dhënë më në fund mundësinë për një “rifreskim” të identitetit digjital pa humbur të dhënat e tyre.