Një 19-vjeçar shqiptar ka përfunduar në prangat e policisë italiane si një prej tre autorëve të një grabitjeje të dhunshme në një vilë në Bolonja. Ngjarja ka ndodhur gjatë natës mes 30 dhe 31 dhjetorit 2024, ndërsa viktimë e drejtpërdrejtë ka qenë një 17-vjeçar, i cili ndodhej i vetëm në banesë në momentin e sulmit.

Sipas mediave italiane, tre persona me fytyra të mbuluara kanë hyrë në vilën që ndodhet në rrugën “Marco Emilio Lepido”, ku kanë neutralizuar të miturin duke ia lidhur duart dhe këmbët me lidhëse plastike. Më pas, ata kanë plaçkitur banesën, duke marrë ora dore, bizhuteri, aksesorë veshjeje, një televizor, pajisje shtëpiake si edhe përmbajtjen e një kasaforte, e cila ishte hapur me trapan.

Pas grabitjes, autorët janë larguar me një automjet që rezultonte i vjedhur disa ditë më parë në zonën e San Lazzaro-s. Hetimet e policisë janë fokusuar kryesisht në analizën e të dhënave telefonike, ku janë shqyrtuar qindra komunikime dhe informacione teknike.

Provat e mbledhura, të cilat janë konsideruar të forta dhe janë konfirmuar edhe nga gjyqtari hetues, çuan në identifikimin dhe arrestimin e 19-vjeçarit shqiptar, i cili rezulton me precedent penal për grabitje. Ai është dërguar në burg, ndërsa hetimet vijojnë për identifikimin dhe kapjen e dy personave të tjerë të përfshirë në ngjarje.