Kapja e udhëheqësit të Venezuelës, Nicolás Maduro, nga Shtetet e Bashkuara ka hapur një kapitull të paprecedentë dhe ka krijuar paqartësi të mëdha mbi drejtimin e vendit të pasur me naftë. Presidenti amerikan Donald Trump e cilësoi operacionin si “mahnitës dhe të fuqishëm”, duke e paraqitur atë si një moment vendimtar për hemisferën perëndimore.

Trump deklaroi të shtunën se zëvendëspresidentja venezuelase Delcy Rodríguez, pjesë e rrethit të ngushtë që ka ndarë pushtetin me Maduron, ishte betuar pas arrestimit të tij. Ai shtoi se Rodríguez kishte komunikuar edhe me sekretarin amerikan të Shtetit, Marco Rubio, çka nxiti spekulime se ajo mund të merrte drejtimin e vendit.

Sipas Kushtetutës së Venezuelës, në mungesë të presidentit, detyra kalon te zëvendëspresidentja. Gjykata e Lartë e vendit urdhëroi që Delcy Rodríguez të merrte postin e presidentes në detyrë të shtunën në mbrëmje. Megjithatë, vetëm pak orë më vonë, ajo doli në televizionin shtetëror e shoqëruar nga figura kyçe të regjimit, përfshirë vëllain e saj dhe kryetarin e Asamblesë Kombëtare Jorge Rodríguez, ministrin e Brendshëm Diosdado Cabello dhe ministrin e Mbrojtjes Vladimir Padrino López.

Në këtë paraqitje, Rodríguez deklaroi se “Nicolás Maduro mbetet presidenti i vetëm i Venezuelës”, duke sinjalizuar se bërthama e pushtetit vazhdon të qëndrojë e bashkuar, pavarësisht zhvillimeve dramatike.

Ndërkohë, Trump mbylli publikisht derën e bashkëpunimit me lideren e opozitës Maria Corina Machado, duke deklaruar se ajo “nuk gëzon mbështetje reale brenda vendit”. Kjo pavarësisht faktit se vëzhgues ndërkombëtarë kanë pohuar se kandidati i mbështetur prej saj fitoi bindshëm zgjedhjet e vitit 2024, të cilat u kontestuan nga qeveria e Maduros.

Analistët theksojnë se pushteti në Venezuelë nuk varet vetëm nga figura e presidentit, por nga një strukturë komplekse civile-ushtarake e ndërtuar gjatë më shumë se një dekade. Në këtë ekuilibër, Delcy dhe Jorge Rodríguez përfaqësojnë krahun civil, ndërsa Cabello dhe Padrino López përfaqësojnë krahun ushtarak.

“Mund të largosh individë nga maja e qeverisë, por për një ndryshim real duhen shumë aktorë në nivele të ndryshme”, u shpreh një ish-zyrtar amerikan i përfshirë në çështjet venezuelase.

Vëmendja kryesore e analistëve është përqendruar te Diosdado Cabello, i cili ushtron ndikim të drejtpërdrejtë mbi shërbimet e kundërzbulimit dhe është cilësuar si figura më ideologjike dhe më e paparashikueshme e regjimit. “Fokusi tani është te Diosdado Cabello”, tha strategu ushtarak venezuelas Jose Garcia, duke e përshkruar atë si elementin më të rrezikshëm të sistemit aktual të pushtetit.

Organizatat ndërkombëtare, përfshirë Kombet e Bashkuara, kanë dokumentuar shkelje të rënda të të drejtave të njeriut nga shërbimet e inteligjencës venezuelase, ndërsa situata pas kapjes së Maduros mbetet e paqartë dhe me pasoja potencialisht të thella për stabilitetin e gjithë rajonit.