Hetimet e prokurorisë për vrasjen e Pavlin Prekës, e ndodhur më 26 shkurt të vitit të kaluar, tregojnë se nuk ka pasur konflikte të tjera që mund të shpjegojnë ngjarjen, përveç përpjekjeve të viktimës për të qenë me vajzën e të dyshuarit Vasel Koçeku dhe refuzimit të babait për t’i dhënë dorën e saj.

Emisioni “Në Shënjestër” publikoi dëshminë e vajzës, e cila tha se nuk kishte pasur asnjë kontakt me Pavlin Prekën dhe se motivin e vizitës së tij e kishte mësuar shumë më vonë, vetëm pas pyetjes së babait. Ajo shtoi se nuk kishte komunikuar kurrë me të riun në rrjetet sociale dhe nuk kishte dijeni për konflikte mes familjes së saj dhe viktimës.

Nga përgjimet ambientale mes familjes Koçeku dhe Klaudio Lisajt, i cili konsiderohet shok dhe kushëriri i vajzës, rezulton se nuk ka pasur komunikim midis dy të dyshuarve, ndërsa ditën e ngjarjes ka pasur kontakt të drejtpërdrejtë mes Pavlin Prekës dhe Klaudio Lisajt. Ky i fundit, sipas hetimeve, ka shmangur deklarimin e bisedave për raportin që viktima dëshironte të kishte me vajzën e Vasel Koçekut.

Prokuroria pranë Gjykatës së Shkallës së Parë Shkodër nxori urdhër ndalimi për Vasel Koçekun dhe Klaudio Lisajn, të cilët akuzohen për veprën penale “Vrasje me paramendim”, kryer në bashkëpunim. Të ndaluarit refuzuan të jepnin sqarime mbi akuzat që u atribuohen.

Hetimet e deritanishme konfirmojnë se lidhja e drejtpërdrejtë mes viktimës dhe familjes Koçeku, përfshirë tatuazhin me emrin e vajzës në qafën e Klaudio Lisajt, ka luajtur rol kyç në motivin e ngjarjes.