Një trup i pajetë i një burri me identitet ende të panjohur është gjetur në një nga plazhet e Qipros, ndërsa autoritetet po hetojnë mundësinë që viktima të ketë lidhje me zhdukjen misterioze të biznesmenit rus 56-vjeçar, Vladislav Baumgartner, i cili rezulton i zhdukur që prej 7 janarit.

Sipas raportimeve, në vendngjarje kanë mbërritur menjëherë anëtarë të Bazave Britanike, Shefi i Policisë së Limasolit dhe oficeri i Njësisë TAE, të cilët kanë izoluar zonën dhe kanë nisur procedurat hetimore. Trupi u gjet në një fazë të avancuar dekompozimi, duke e bërë të pamundur identifikimin e menjëhershëm.

Autoritetet bënë të ditur se kufoma do të transferohet në morgun e Bazave Britanike, ku të enjten pritet të kryhet autopsia dhe marrja e mostrave ADN për të përcaktuar identitetin. Policia e Qipros nënvizoi se për momentin nuk ka konfirmim zyrtar nëse trupi i përket Baumgartnerit, ndërsa hetimet për zhdukjen e tij janë fokusuar kryesisht në zonën e Pissourit dhe Kavo Aspro, ku telefoni celular i tij regjistroi aktivitetin për herë të fundit.

Zhdukja e 56-vjeçarit u raportua pas ndërprerjes papritmas të komunikimeve, ndërsa operacioni i kërkimit u zhvillua me pjesëmarrjen e policisë, Mbrojtjes Civile, vullnetarëve dhe personelit të Bazave Britanike, duke përdorur helikopterë dhe dronë. Kërkimet janë ndërprerë disa herë për shkak të reshjeve të dendura dhe kushteve të këqija të motit.

Autoritetet u bëjnë thirrje qytetarëve që kanë informacion të vlefshëm për rastin të kontaktojnë Departamentin e Hetimit të Krimit në Limasol.