Reagime të forta kanë ardhur nga familja e viktimës pas vendimit të Këshillit të Lartë të Prokurorisë për të vlerësuar dhe avancuar prokuroren Postoli. Në një postim publik në Facebook, Jonida Proga ka shprehur indinjatën e saj, duke e cilësuar vendimin si të papranueshëm dhe fyes për familjen e saj.

Sipas Progës, gjatë procesit gjyqësor prokurorja Postoli ka deklaruar se vëllai i saj ka humbur jetën si pasojë e një grushti, një version që familja e kundërshton kategorikisht. Ajo thekson se autori i dyshuar, Denis Meçe, ishte një person me precedentë kriminalë, i njohur në Pogradec si gjobaxhi ndaj tregtarëve dhe i rrezikshëm për komunitetin.

Në reagimin e saj, Jonida Proga i drejtohet drejtpërdrejt kryetares së KLP-së dhe anëtarëve të këtij institucioni, duke i akuzuar se “mbyllin sytë” përballë fakteve dhe dhimbjes së familjarëve të viktimave.

“Faleminderit Prof. Mirela! Po të masakrohej vëllai yt nga kriminelët e gjobaxhinjtë, a do e dekoroje prokuroren që tha ‘vdiq nga një grusht’? Faleminderit të gjithë anëtarëve të KLP që mbyllni sytë sa herë votoni, për të mos parë ç’keni para!”, shkruan ajo.

Reagimi ka nxitur diskutime të gjera në rrjetet sociale, duke rikthyer në vëmendje debatin mbi përgjegjësinë institucionale, standardet e vlerësimit të prokurorëve dhe ndjeshmërinë ndaj familjeve të viktimave në proceset e drejtësisë.