Një konflikt për motive të dobëta ka përfunduar tragjikisht pas mesnate në aksin rrugor Mamurras–Fushë Krujë, ku një 57-vjeçar ka humbur jetën si pasojë e dhunës.

Ngjarja u regjistrua rreth orës 00:40, pranë fshatit Bushnesh. Sipas të dhënave paraprake, konflikti ka nisur mes dy personave për përparësinë e kalimit në rrugë. Gjatë përplasjes, shtetasi Andi Vokri, 28 vjeç, banues në Thumanë, dyshohet se ka goditur me çekiç Petrit Ndoun, 57 vjeç, duke i shkaktuar vdekjen.

I riu është arrestuar menjëherë pas ngjarjes nga shërbimet e Policisë dhe është shoqëruar për veprime të mëtejshme procedurale.

Në njoftimin zyrtar, Policia bën me dije se:
“Rreth orës 00:40, në aksin rrugor ‘Thumanë–Krujë’, dyshohet se gjatë një konflikti për motive të dobëta, është goditur me sende të forta dhe për pasojë ka humbur jetën shtetasi P. N., 57 vjeç. Shërbimet e Policisë kanë kapur dhe shoqëruar autorin e dyshuar.”

Grupi hetimor, nën drejtimin e Prokurorisë, po vijon punën për zbardhjen e plotë të rrethanave dhe dokumentimin ligjor të kësaj ngjarjeje të rëndë.