Gjithçka mbetet e hapur para ndeshjeve të raundit të fundit të fazës së ligës në Champions League, ku 30 skuadra janë ende në pritje të fatit të tyre. Vetëm pak ekipe kanë siguruar matematikisht objektivat, ndërsa pjesa më e madhe do të vendosë gjithçka në 90 minutat e fundit.

Arsenali është tashmë i kualifikuar në 1/8-at e finales dhe do t’i bashkohet Bayern Munich. “Topçinjtë” kanë regjistruar shtatë fitore në po aq ndeshje dhe u mjafton një barazim në shtëpi ndaj Kairat Almaty për ta mbyllur fazën në vendin e parë.

Situata mbetet e favorshme edhe për Liverpoolin dhe Real Madridin, të dyja me nga 15 pikë, si dhe për Tottenhamin me 14. Një fitore në javën e fundit do t’u siguronte kualifikimin direkt në 1/8-at e finales. Liverpooli pret Qarabag-un në “Anfield”, ndërsa Real Madrid udhëton në Lisbonë për t’u përballur me Benfikën e drejtuar nga Jose Mourinho, ish-trajneri i “Los Blancos”.

Në garën e fortë për tetëshen e parë janë gjithashtu PSG, Newcastle, Chelsea, Manchester City dhe Atalanta, të gjitha me nga 13 pikë. Chelsea do të luajë në transfertë ndaj Napolit të Antonio Contes, një tjetër ish-trajner i londinezëve, ndërsa Newcastle e pret një sfidë tepër e vështirë në Paris përballë PSG-së.

E hapur mbetet edhe lufta për zonën e play-off-it, me skuadra deri në vendin e 32-të, përfshirë Ajax-in, që ende kanë shanse matematikore për të vazhduar rrugëtimin. Deri tani, vetëm katër ekipe janë eliminuar zyrtarisht.

Një mbrëmje e fundit që pritet të dhurojë emocione të forta, përplasje direkte dhe verdikte vendimtare, të denja për historinë e Champions League.